दाङमा बाढीले २० घर बगायो, ५० घर डुबानमा

दाङ – शुक्रबार रातीदेखिको लगातार भएको वर्षाका कारण खहरे खोला तथा बबइ नदीमा आएको बढीले दाङमा २० भन्दा बढी घर बगाएको छ भने ५० भन्दा बढी घर डुबानमा परेको छ।

 

इलाका प्रहरी कार्यालय तुलसीपुरका अनुसार तुलसीपुर उपमहानगरपालिका  १४ फूलवारीमा स्थानीय तुही खोलाले बगाउँदा एक महिलाको मृत्यु भएको छ । स्थानीय भगवती सुनारलाई शुक्रवार राती खोलाले बगाएको हो । बाख्रा सार्न राती बाहिर निस्केको बेला उनलाई खोलाले बगाएको प्रहरीले जनाएको छ । उनको शव शनिवार बिहान घर नजिकै झ्याङमा अड्किएको अवस्थामा फेला परेको थियो।

 

 

 

दंगीशरण गाउँपालिकाको गोल्टाकुरीमा ६ वटा घर भत्कीएका छन् । बबई नदीमा आएको बाढीले ६ घर भत्काएको स्थानीय प्रकाश डाँगीले जानकारी दिएका छन् । बबईको बाढीले ४० बढी घर डुबानमा परेको पनि उनले जानकारी दिए । यसैगरी तीन वर्ष अघिको बाढीले ठूलो विपत्ति निम्त्याएको तुलसीपुर उपमहानगरपालिकाको मोतीपुर गाउँमा पुनः ४ घर बगाएको छ । तीन वर्ष अघि बाढीबाट विस्थापित चार परिवारलाई पुनः बबईले विस्थापित बनाएको छ । यसैगरी लमही नगरपालिका ९ अमिलियामा ७ घर स्थानीय खहरे खोलाले भत्काएको छ । स्थानीय फिरंगी खोलामा आएको बाढीले ७ घर बगाएको छ । बाढीले त्यहाँ बालीनालीमा समेत क्षति पुर्याएको छ । बबईको तटीय क्षेत्रमका रहेका थुप्रै बस्तीका घर परिवारहरू बाढीको त्रासका कारण विस्थापित बनेका छन् । कैयन स्थानमा बाढी पसेर घर डुवानमा परेका छन्।

 

उता देउखुरीमा भने राप्ती नदीले खेतीयोग्य जमिन कटान गरेको छ । राप्तीले बस्ती भने डुवानमा पारेको छैन् ।
यसैबीच लगातारको वर्षाका कारण घोराही तुलसीपुर सडक खण्डका सडक भत्किएको छ । तुलसीपुर उपमहानगरपालिकाको मोतिपुर भन्ने स्थानमा सानो कल्भर्टमा आएको पानीको ठूलो मुलले सडक बीच भागबाटै भत्काइदिएको छ । सडक बीच भागबाट भत्काएपछि सवारी आवागमन ठप्प भएको छ । यसैगरी यहाँका पुलविहिन खोलाहरुमा आएको बाढीका कारण लमही तुलसीपुर सडक खण्डमा  यातायात सेवा विहानै देखि अवरुद्ध छ ।

 

शुक्रबार रातीदेखिको वर्षा अहिले पनि जारी रहेकाले तटीय क्षेत्रका वस्तीहरू डुवानको उच्च जोखिममा छन् । स्थानीयहरू त्रसित बनेका छन् । यसअघि २०७१ साउन २९ गते दाङको बबई नदीमा आएको बाढीले स्थानीय नागरिकको ज्यानै जानुका साथ सैयौँ घर बगाएको थियो ।

प्रतिक्रिया दिनुहोस

Your email address will not be published. Required fields are marked *